ຈະ​ແກ້​ພວກ​ເຫັນ­ແກ່­ຕົວ​ກູ... ຂອງ​ກູ​ຢ່າງ­ໃດ? - ໂດຍ : ດັ້ນ​ກີບ​ເມກ

4,886 03 ມ.ສ. 2017 ນານາສາລະ

ໃນ​ໄລ­ຍະ​ທາງ​ປະ­ມານ 7 ກິ­ໂລ­ແມັດ ຈາກ​ເຮືອນ​ຫາ​ບ່ອນ​ເຮັດ​ວຽກ ທຳ​ມະ​ດາ​ການ​ເດີນ­ທາງ​ກໍ່​ໃຊ້​ເວ​ເວ­ລາ 10-20 ນາ­ທີ ກໍ່​ຮອດ ແຕ່​ດຽວ­ນີ້​ໄວ​ສຸດ​ກໍ່​ແມ່ນ 30 ນາ­ທີ ທັງ​ເຊົ້າ ແລະ ແລງ... ອາ­ທິດ​ໜຶ່ງ 5 ວັນ ເຫັນ​ອຸ­ບັດ​ຕິ​ເຫດ​ຢ່າງ​ໜ້ອຍ 3 ຄັ້ງ ມີ​ທັງ​ລົດ­ຈັກ​ຕຳ​ລົດ­ຈັກ ລົດ­ຈັກ​ຕຳ​ລົດ​ໃຫຍ່ ແລະ ອື່ນໆ ມີ​ບາງ­ເທື່ອ​ກໍ່​ເສຍ​ຊີ­ວິດ​ຄາ​ທີ່ ແລະ ໄປ​ເສຍ​ຊີ­ວິດ​ຢູ່​ໂຮງ­ໝໍ​ກໍ່​ມີ...

ນອກ­ຈາກ​ເຫັນ​ອຸ­ບັດ​ຕິ​ເຫດ​ແລ້ວ ຍັງ​ເຫັນ​ຄົນ​ຂັບ​ລົດ​ແບບ​ບໍ່​ຫ່ວງ​ໂລກ​ຫຼາຍ​ກໍ­ລະ­ນີ ໝາ­ຍວ່າ ເອົາ​ໂຕ​ເອງ​ເປັນ​ໃຫຍ່ ໄປ​ໄວ... ແຊງ​ໝູ່​ຖື​ວ່າ​ເກ່ງ ໄປ​ຮອດ​ເປົ້າ​ໝາຍ... ພວກ​ນີ້​ບໍ່​ສົນ​ເຂົ້າ​ເລນ... ບໍ່​ສົນ​ແຊງ​ຖືກ​ເລັນ ເອົາ​ແຕ່​ໝົ້້ນ​ໄປ​ໄດ້​ຫຼະ​ແມ່ນ​ໄປ​ໂລດ... ບາງ​ກໍ­ລະ­ນີ​ໂພ້­ໂວ້​ມາ​ຈາກ​ຮ່ອມ​ຂັບ​ໄວ ລ່ວງ​ມາ​ທາງ​ໃຫຍ່​ໂລດ ຊຸມ​ນີ້​ລະ! ເປັນ​ຜູ້​ກໍ່​ອຸ­ບັດ​ຕິ​ເຫດ... ຮອງ​ລົງ​ມາ​ແມ່ນ​ພວກ​ຈອດ​ລົດ​ໃຫຍ່​ແບບ​ບໍ່​ສົນ​ໃຜ... ທັນ​ໃສ​ຫຼະ​ແມ່ນ​ຈອດ​ໂລດ ຢູ່​ໃກ້​ໄຟ​ແດງ​ກໍ່​ບໍ່​ສົນ... ຈອດ​ກາງ​ທາງ​ສອງ​ຊ້ອນ​ລົມ​ກັນ​ກັບ​ຄົນ​ແຄມ​ທາງ ແລະ ອື່ນໆ ມາ​ສັງ­ເກດ​ເບິ່ງ​ແລ້ວ ຄົນ​ບໍ່​ເກງ​ກົວ​ລະ­ບຽບ​ການ ຄົນ​ຖື​ເບົາ​ສະ­ຕິ​ສັງ­ຄົມ​ຫຼາຍ​ຂຶ້ນ ໃນ​ຂະ­ນະ​ດຽວ​ກັນ​ຕ້ອງ​ຍອມ­ຮັບ​ວ່າ ກຳ­ລັງ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ​ບໍ່​ພຽງ­ພໍ ມີ​ແຕ່​ປະ­ຈຳ­ການ​ຕາມ​ປ້ອມ ບາງ­ເທື່ອ​ກໍ່​ບໍ່​ເຄັ່ງ​ຄັດ​ປານ­ໃດ.

ເຖິງ​ເວ­ລາ​ທີ່​ຈະ​ຕ້ອງ​ເຂັ້ມ​ງວດ​ລະ­ບຽບ​ການ​ແລ້ວ​ຫຼື​ຍັງ?... ແຈ້ງ​ການ-ຄຳ​ສັ່ງ​ອອກ​ມາ​ລຽນ­ຕິດ ແຕ່​ຄົນ​ບໍ່​ປະ­ຕິ­ບັດ ເລີຍ​ພາ​ໃຫ້­ການ​ສັນ­ຈອນ​ຢູ່​ນະ­ຄອນ­ຫຼວງ​ດຽວ­ນີ້​ສັບ­ສົນ... ເຖິງ​ວ່າ​ຖະ­ໜົນ​ຈະ​ປັບ­ປຸງ​ໃຫ້​ກວ້າງ­ຂວາງ ແຕ່​ປະ​ໃຫ້​ຂີດ​ເສັ້ນ​ຮັບ​ຝາກ​ລົດ​ແບບ​ບໍ່​ຮັບ­ປະ­ກັນ​ການ​ເສຍ​ຫາຍ​ຄື​ຮູ້ ຍັງ​ແຜ່​ຫຼາຍ... ການ​ຈອດ​ລົດ​ຊະ­ຊາຍ... ການ​ບຽດ​ຢຶດ​ທາງ​ຄົນ​ຍ່າງ​ກໍ່​ຍິ່ງ​ເພີ່ມ​ຄວາມ​ສ່ຽງ​ເກີດ​ອຸ­ບັດ​ຕິ​ເຫດ.

ການ​ແກ້​ການ​ສັນ­ຈອນ​ແອ​ອັດຄວນ​ໄດ້​ເຮັດ​ປະ­ສານ​ກັນ ເຊັ່ນ​ວ່າ: ປາບ​ພວກ​ຂີ່​ລົດ​ບໍ່​ຮູ້​ກົດ​ຈະ­ລາ­ຈອນ ປາບ​ພວກ​ຈອດ​ຊະ­ຊາຍ ປາບ​ພວກ​ບຽດ​ຢຶດ​ທາງ​ຍ່າງ ເຮັດ​ພາບ​ດຽວ​ກັນ​ຈຶ່ງ​ຈະ​ແກ້​ໄດ້ ການ​ແກ້​ໄຂ​ນີ້​ຕ້ອງ​ໃຫ້​ເຈົ້າ​ຂອງ​ທ້ອງ­ຖິ່ນ​ເປັນ​ເຈົ້າ​ການ ຄັນ​ແມ່ນ​ບ້ານ-ເມືອງ​ບໍ່​ເດັດ­ຂາດ​ຈິງ​ໃຈ​ແລ້ວ ຄື​ຊິ​ບໍ່​ບັນ­ລຸ​ຜົນ​ປານ­ໃດ?.

ຄັນ​ເຮົາ​ບໍ່​ແກ້​ເດັດ­ຂາດ ຄົນ​ລືມ​ໂຕ​ຄິດ​ວ່າ​ໜ້າ​ເຮືອນ ເຊິ່ງ​ເປັນ​ຖະ­ໜົນ​ແມ່ນ​ຂອງ​ຕົນ ຕັ້ງ​ປ້າຍ​ຫ້າມ​ຈອດ... ບຽດ​ຢຶດ​ທາງ​ຍ່າງ... ຄິດ​ວ່າ​ມີ​ເງິນ​ຊື້​ລົດ​ກໍ່​ຂີ່​ລົງ​ຖະ­ໜົນ​ໂລດ ຄວາມ​ຄິດ​ເຫຼົ່າ­ນັ້ນ​ອັນ­ຕະ­ລາຍ ເພາະ​ເປັນ​ອາ­ນາ​ທິ​ປະ​ໄຕ ລະ­ບົບ​ການ​ຈັດ­ການ​ກໍ່​ເຮັດ​ລຳ­ບາກ​ເປ້ຍ​ລ່ອຍ​ໄປ... ຍານ​ໄປ?.

ຄິດ​ເປັນ​ຫ່ວງ... ຄິດ​ໄກ​ໄປ​ແຕ​ກໍ່​ມີ​ຄວາມ​ຈິງ​ໃຈ ຢາກ​ໃຫ້­ການ​ແກ້​ໄຂ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ ເພາະ​ສູ່​ມື້­ນີ້​ຄົນ​ຢູ່​ແບບ​ບໍ່​ຫ່ວງ​ໂລກ​ມີ​ຫຼາຍ​ຂຶ້ນ​ກວ່າ​ແຕ່​ກ່ອນ ເຫັນ­ແກ່­ຕົວ​ກູ ແລະ ຂອງ​ກູ​ຫຼາຍ​ໂພດ.

ສະ­ເໜີ​ເປັນ​ການ​ແລກ­ປ່ຽນ.

ຂ່າວທີ່ກ່ຽວຂ້ອງ