ດື່ມ​ບໍ່​ຂັບ - ໂດຍ : ດັ້ນ​ກີບ​ເມກ

1,590 24 ມີ.ນ. 2017 ນານາສາລະ

ຜ່ານ​ທາງ​ໄປ​ວຽກ ຜູ້​ຂຽນ​ສັງ­ເກດ​ເຫັນ​ປ້າຍ​ໂຄ­ສະ­ນາ​ທີ່​ຕິດ​ຢູ່​ເສົາ​ໄຟ­ຟ້າ ​ວ່າ: ດື່ມ​ບໍ່​ຂັບ (Drink don’t drive) ເຊິ່ງ​ເຫັນແລ້ວ​ແມ່ນ​ຮູ້­ສຶກ​ດີ­ໃຈ​ແທ້ ຖ້າ­ວ່າ​ແຕ່​ລະຄົນ​ເມື່ອ​ເຫັນ​ປ້າຍ​ໂຄ­ສະ­ນາ​ບອກ​ວ່າ ຖ້າ​ມີ​ການດື່ມ​ເຫຼົ້າ​ຈົນ​ມຶນ­ເມົາ​ ແລ້ວ​ບໍ່​ຕ້ອງຂັບ​ຂີ່​ລົດ​ຍານ​ພາຫະ​ນະ ເພາະ​ຈະ​ພາ­ໃຫ້​ເກີດ​ອຸ­ບັດ​ຕິ​ເຫດ ໂດຍ​ສະເພາະໃນ​ໄລ­ຍະ​ນີ້​ໃກ້​ປີ​ໃໝ່​ກຸດ​ສົງ​ການ­ບ້ານ​ເຮົາ ຍັງອີກ​ບໍ່​ພໍ​ທໍ່​ໃດ​ອາ­ທິດ ນອກ­ຈາກເຫັນ​ປ້າຍ​ໂຄສະ​ນາ​ແລ້ວ ເວ­ລາ​ນັ່ງ​ລົດ​ໄປ​ວຽກ​ຍັງ​ມີ​ໂອ­ກາດໄດ້​ຟັງ​ຄື້ນ​ວິ­ທະ­ຍຸ​ບາງ​ຄື້ນ​ທີ່ນຳ​ສະ­ເໜີ​ບັນ­ຫາ​ອຸ­ບັດ​ຕິ​ເຫດ​ທາງ​ຖະ­ໜົນ.

ຜູ້​ຂຽນ​ມັກ​ຟັງ​ວິ­ທະ­ຍຸ​ເວ­ລາ​ນັ່ງ​ລົດ ເຮັດ​ໃຫ້​ເຮົາຮູ້​ບັນ­ຫາ​ສັງ­ຄົມ ໂດຍ​ສະ­ເພາະໃນ​ກໍ­ລະ­ນີ​ໂຄ­ສົກເພິ່ນ​ເວົ້າ​ເລື່ອງ​ບັນ­ຫາການ​ສັນ­ຈອນ ແລະ ປາ­ກົດການ​ຫຍໍ້­ທໍ້​ຂອງ​ສັງ­ຄົມ ເພາະ​ສອງ​ບັນ­ຫາ​ນີ້ ມັນກ່ຽວ­ຂ້ອງ​ກັບ​ທຸກ​ຄົນ​ທີ່­ຢູ່​ຮ່ວມ​ສັງ­ຄົມ​ດຽວ​ກັນ ໂດຍ​ສະ­ເພາະບັນ­ຫາ​ການ​ຂັບ​ຂີ່​ລົດ​ໃນ​ທີ່​ຂາດ​ລະບຽບ ຫຼືວ່າລົດ​ທີ່​ເຕັກ­ນິກ​ບໍ່​ຄົບ ເຊັ່ນ: ໄຟ​ຕາ ຫຼື ເບກ​ໜ້າ​ບໍ່​ມີ ເປັນ­ຕົ້ນ ເຊິ່ງ​ສ່ວນ​ໃຫຍ່​ກໍ່​ແມ່ນ​ພວກລົດ­ຈັກ​ທີ່​ກຸ່ມ​ໄວ​ລຸ້ນ​ມັກ​ຕົກ­ແຕ່ງ​ດັດ­ແປງ​ເພື່ອ​ຂີ່ອວດ​ກັນ ຂີ່​ແຂ່ງ​ກັນ ທັງ​ຍົກ​ລໍ້​ອວດ​ຊາວ­ບ້ານ  ຕາມ​ພາ­ສາ​ຄົນ​ໜຸ່ມ​ນ້ອຍ​ທີ່​ຮູ້​ເທົ່າ​ບໍ່​ເຖິງ​ການ ບາງ​ຄົນ​ຂັບ​ຂີ່​ລົດ​ໃຫຍ່​ຂາດ​ສະ­ຕິ​ ເວ­ລາ​ເປີດ​ໄຟ​ສັນຍານ​ແລ້ວ​ບໍ່​ໄດ້​ມອດ ເຮັດ​ໃຫ້​ຜູ້​ຂັບ​ຂີ່​ຕາມ​ຖະ­ໜົນນຳ​ກັນ​ເຂົ້າ­ໃຈ​ຜິດ ກໍ່​ສາ­ມາດ​ຕຳ​ກັນ​ໄດ້ ນີ້​ຄື​ບັນຫາ​ການ​ຂາດ​ສະ­ຕິ ຫຼື ບໍ່​ເອົາ­ໃຈ­ໃສ່​ໃຫ້​ຄວາມສຳຄັນ ອາດ​ຄິດ​ວ່າ​ຂໍ​ໃຫ້​ຕົນ​ໄປ​ກ່ອນ​ກະ​ແລ້ວ ອີກ​ບັນຫາ​ໜຶ່ງ​ທີ່​ໄດ້​ຍິນ​ໂຄ­ສົກ​ວິ­ທະ­ຍຸ​ເວົ້າ​ແມ່ນເລື່ອງການ​ໃຊ້​ໂທລະ­ສັບໃນ​ເວ­ລາ​ຂັບ​ຂີ່​ລົດ ເຖິງ​ແມ່ນວ່າ​ຈະ​ມີ​ການ​ເວົ້າ​ຕັກ­ເຕືອນ ຫຼື ໂຄ­ສະ­ນາ​ຫ້າມ​ຈົນເປັນ​ທີ່​ເຂົ້າ­ໃຈ​ກັນ​ແລ້ວ​ກໍ່​ຕາມ ແຕ່​ບາງຄົນ​ເຮັດ​ຄືວ່າ ຮູ້​ແລ້ວ​ຕ່າວ​ພາ­ໂລ ບັນ­ຫາ​ລົດ​ຕຳ​ກັນ​ຍ້ອນ​ຄາລົມ​ໂທລະ­ສັບ​ເກີດ​ຂຶ້ນ​ຫຼາຍ​ກໍ­ລະ­ນີ ເພາະ​ເວ­ລາຄົນ​ລົມໂທລະ­ສັບ​ເຮັດ​ໃຫ້​ຂາດ​ສະ­ຕິ ຫຼື ບໍ່​ດັ່ງ­ນັ້ນກໍ່​ແມ່ນ​ພວກ​ຂີ່​ລົດ­ຈັກ​ທີ່​ມັກ​ເຫັນ​ເຂົາ​ພາ­ກັນ​ຫຼິ້ນໂທລະ­ສັບ​ມື​ໜຶ່ງ ແລະ ອີກ​ມື​ໜຶ່ງ​ກໍ່​ບິດ​ເຂົາ​ລົດ­ຈັກ ສ່ວນ​ຕາ​ກໍ່​ຈ້ອງ​ເບິ່ງ​ແຕ່​ໜ້າ​ຈໍ​ໂທລະ­ສັບ ບັນ­ຫາ​ນີ້ພວກ​ເຮົາ​ຄວນ​ມີ​ລະ­ບຽບ​ເຄັ່ງ​ຄັດ ມີ​ບົດ​ລົງ­ໂທດປັບ​ໃໝ ລວມ​ທັງ​ການ​ກວດ­ກາ​ເຕັກ­ນິກ​ບໍ່​ຄົບ ຫຼື ເມົາ​ແລ້ວ​ຂັບ​ຂີ່​ລົດ ເປັນ­ຕົ້ນ ເພາະ​ຖ້າ­ວ່າ ລະ­ບຽບການ​ຫາກ​ເຄັ່ງ​ຄັດ​ເດັດ­ຂາດກັບ​ພຶດ­ຕິ​ກຳ​ຂັບ​ຂີ່​ລົດທີ່​ເວົ້າ​ມາ​ຂ້າງ​ເທິງ​ນັ້ນ ​ອາດ​ຊ່ວຍ​ຫຼຸດ​ອຸ­ບັດ​ຕິ​ເຫດໄດ້​ຈຳ­ນວນ​ໜຶ່ງ.

ຢ່າງ­ໃດ​ກໍ່​ດີ ປີ​ໃໝ່​ລາວ​ໃກ້​ມາ​ຮອດ​ແລ້ວ ພວກເຮົາ​ບໍ່​ຄວນ​ປະ­ໝາດ​ໃນ​ການ​ຫຼິ້ນ​ກິນ ເຊັ່ນ: ຫຼິ້ນນ້ຳ-ສາດ​ນ້ຳ ກໍ່​ຄວນ​ເບິ່ງຄວາມ​ເໝາະ​ສົມ ໂດຍສະ­ເພາະ​ທາງ​ຝ່າຍ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນເພິ່ນ​ກໍ່​ຝາກ​ມາ​ວ່າ ຂໍ​ໃຫ້​ພໍ່​ແມ່​ຜູ້​ປົກ­ຄອງ​ຄວນບອກ­ສອນແນະ­ນຳ​ລູກ​ຫຼານ​ຂອງ​ຕົນ​ເອງ​ຕື່ມ ​ໃຫ້ເຂົາ­ເຈົ້າ​ມີ​ສະ­ຕິ  ແລະ ຮູ້­ຈັກ​ໄປ​ມາ​ດ້ວຍ​ຄວາມລະ­ມັດ­ລະ­ວັງ ເພາະ​ຖ້າ​ເກີດ​ອຸ­ບັດ​ຕິ​ເຫດ​ເຖິງ​ແກ່​ຊີວິດ​ກໍ່​ມີ​ແຕ່​ຟາຍ­ນ້ຳ­ຕາ ແລ້ວ​ເປັນ​ຫຍັງ​ບໍ່​ພາ­ກັນບອກ­ສອນ​ເຂົາ­ເຈົ້າ​ຕັ້ງ­ແຕ່​ຕົ້ນ​ ເພື່ອ​ຈະ​ໄດ້​ປະ­ຕິ­ບັດເປັນ​ນິ­ໄສ... ຊີ­ວິດ​ຄົນ​ເຮົາ​ເກີດ​ມາ​ໄດ້​ຄັ້ງ​ດຽວ ສະນັ້ນ ຈຶ່ງ​ບໍ່​ແມ່ນ​ເລື່ອງ​ຊິ​ເອົາ​ຊີ­ວິດ​ມາ​ທົດ​ລອງ​ໃນການ​ຂັບ​ຂີ່... ຕາຍ​ແລ້ວ​ບໍ່​ມີ​ໃຜ​ເກີດ​ໄດ້​ເນີ້!...

ຂໍ​ສະ­ເໜີ​ເປັນ​ການ​ແລກ­ປ່ຽນ​ນໍ?

ຂ່າວທີ່ກ່ຽວຂ້ອງ