ເຈົ້າພາບ ກຳນົດ 30 ປະເພດ​ກີລາ ຊຽງ​ຂວາງ ເກມ

985 17 ມີ.ນ. 2017 ວົງຈອນກີລາ
ເຈົ້າພາບ ກຳນົດ 30 ປະເພດ​ກີລາ ຊຽງ​ຂວາງ ເກມ

    ກອງ​ປະຊຸມ​ລະດັບ​ຊາດ ຄັ້ງ​ທີ 2 ຂອງ​ຄະນະ​ຮັບຜິດຊອບ​ຈັດ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ 11 ຈັດ​ຂຶ້ນ​ວັນ​ທີ 7 ມີນາ 2017 ທີ່​ແຂວງ​ຊຽງ​ຂວາງ ໄດ້​ຕົກລົງ​ກຳນົດ​ເອົາ 30 ປະເພດ​ກີລາ ເຂົ້າ​ຮ່ວມ​ແຂ່ງຂັນ​ໃນ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຂຽງ​ຂວາງ ເປັນ​ເຈົ້າພາບ ລະຫວ່າງ​ວັນ​ທີ 11-21 ພະຈິກ 2018.
    ທ່ານ ບົວ​ລີ ພັນ​ນາ​ວົງ ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ແຂວງ​ຊຽງ​ຂວາງ​ໃນ​ນາມ​ຄະນະ​ກຳມະການ​ກອງ​ເລຂາ​ຜູ້​ປະຈຳການ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ 11 ໄດ້​ລາຍ​ງານ​ຄວາມ​ຄືບ​ໜ້າ​ພື້ນຖານ​ໂຄງ​ລ່າງ​ສະໜາມ​ແຂ່ງຂັນ​ກີລາ​ປະເພດ​ຕ່າງໆ ມາ​ຮອດ​ປັດຈຸບັນ​ໂດຍ​ລວມ​ແລ້ວ​ຖື​ວ່າ​ມີ​ຄວາມ​ພ້ອມ​ໃນ​ລະດັບ​ໃດ​ໜຶ່ງ ໂດຍ​ສະເພາະ​ການ​ແຂ່ງຂັນ​ຄັ້ງ​ນີ້​ໄດ້​ກຳນົດ​ເອົາ 30 ປະເພດ​ກີລາ​ເຂົ້າ​ຮ່ວມ​ແຂ່ງຂັນ ​ຄື: ແລ່ນ-ລານ ບານບ້ວງ ເຕະບານ ຟຸດ​ຊໍ ມວຍ​ສາກົນ ມວຍ​ລາວ ຢູ​ໂດ ຄາ​ຣາ​ເຕ​ໂດ ເທ​ຄວັນ​ໂດ ປັນ​ຈັກ​ສີ​ລັດ ໜ້າ​ເກັກ ໝາກ​ຂ່າງ ເປ​ຕັງ ບານສົ່ງ​ໃນ​ຮົ່ມ-ບານສົ່ງ​ຫາດ​ຊາຍ ມວຍ​ປ້ຳ​ໃນ​ຮົ່ມ-ມວຍ​ປ້ຳ​ຫາດ​ຊາຍ ໝາກ​ແລ້ ເຮືອ​ຊ່ວງ ດອກ​ປີກ​ໄກ່ ເທັນ​ນິ​ສ ກະຕໍ້ ປິ່ງ​ປ່ອງ ລົດຖີບ ສະນຸກ​ເກີ ໂບ​ລິ້ງ ວູ​ຊູ ໝາກເສິກ ຍິງ​ປືນ ກ໊ອຟ ລອຍນ້ຳ ຮ໊ອກ​ກີ້ ແລະ ຣັກ​ບີ້.
    ສຳລັບ​ແຜນການ​ຕໍ່ໜ້າ​ທີ່​ຈະ​ຕ້ອງ​ໄດ້​ສຸມ​ໃສ່​ບັນຫາ​ຫຼັກ​ແມ່ນ​ການ​ເຊື່ອມ​ຕໍ່​ໄຟຟ້າ ແລະ ນ້ຳ​ປະປາ​ເຂົ້າ​ສູ່​ສະໜາມ​ເປີດ-ປິດ ການ​ກໍ່ສ້າງ​ສະໜາມ​ໃໝ່​ທີ່​ຈຳເປັນ​ຕື່ມ​ອີກ​ຈຳນວນ​ໜຶ່ງ ງົບປະມານ​ບໍລິຫານ​ວຽກ​ງານ​ຕ່າງໆ ແລະ ລົງ​ຊຸກຍູ້​ຕິດຕາມ​ການ​ກໍ່ສ້າງ​ສະໜາມ​ກີລາ​ທີ່​ຍັງ​ບໍ່​ທັນ​ສຳເລັດ​ໃຫ້​ສຳເລັດ​ຕາມ​ແຜນການ​ທີ່​ລະບຸ​ໄວ້ ລວມ​ທັງ​ວຽກ​ງານ​ທີ່​ສຳຄັນ​ອື່ນ​ທີ່​ກ່ຽວ​ພັນ​ກັບ​ພື້ນຖານ​ໂຄງ​ລ່າງ​ໃນ​ການ​ກະກຽມ​ງານ​ຄັ້ງ​ນີ້ ຂະນະ​ທີ່​ສະໜາມ​ກີລາ​ປະເພດ​ອື່ນໆ​ກໍ່​ໄດ້​ລົງ​ມື້​ກໍ່ສ້າງ​ແລ້ວ ແລະ ບາງ​ສະໜາມ​ກຳລັງ​ສຳ​ຫຼວດ​ອອກ​ແບບຄາດ​ວ່າ​ຈະ​ໃຫ້​ສຳເລັດ​ຕົ້ນ​ປີ 2018.

ຂ່າວທີ່ກ່ຽວຂ້ອງ